OKUWÇYLARYŇ BILIM BAŞARNYKLARYNY KÄMILLEŞDIRMEKDE OKUW KITAPLARYNYŇ WE SERIŞDELERINIŇ ORNY
Umumybilim berýän mekdepde okuwçylaryň ukyp-başarnyklaryny emele getirmekde we kämilleşdirmekde, mugallymyň işine ökdeligi bilen bir hatarda, okuw kitaplary, okatmagyň serişdeleri möhüm orny eýeleýär. Ilkinji nobatda, “okuw serişdeleri” diýen düşünjäniň üstünde durup geçeliň. Olar ýörite döredilen, bilim beriş häsiýetli dürli okuw kitaplary, gollanmalary we goşmaça serişdelerdir. Okuw serişdeleri mugallyma okuw işini dolandyrmaga, okuwy täsirli etmäge, okuw dersiniň maksadyna amal etmäge ýardam berýär. Esasy we esasy däl okuw serişdeleri bardyr. Esasy okuw serişdelerine mekdep okuw kitaby, okuw kitabynyň üstüni doldurýan okuw materiallary (gönükmeler ýygyndysy, diktantlar ýygyndysy, sözlükler), görkezme esbaplary degişlidir. Esasy däl okuw serişdelerine paýlama materiallary, şygarlar we ş.m. degişlidir. Ýerine ýetirýän hyzmaty boýunça dürli tehniki enjamlar (synp tagtasy, depderler, interaktiw tagta, multimedia serişdeleri we ş.m.) okuw serişdelerine degişlidir. Okatmagyň serişdeleri diňe toplumlaýyn, sazlaşykly ulanylanda, oňyn netije berip biler.
