TÜRKMENISTANYŇ HEMIŞELIK BITARAPLYGY – HALKARA YNANYŞMAGYŇ KEPILI
Türkmenistanyň Bitaraplyk halkara hukuk ýagdaýy ýurdumyzyň parahatçylykly we durnukly ösüşiniň kepilidir. Halkymyzyň milli häsiýetine, ruhuna öwrülen özbaşdaklyk hem erkanalyk, döwletlilik ýörelgeleri diňe bir ýurduň çäginde däl, eýsem, sebitde we dünýäde abadançylygyň berk daýanjyna öwrüldi. Bitaraplyk syýasatymyzyň mazmunyna halkymyzyň lebzi halallyk, ynsaplylyk, dostluk, sahawatlylyk, açyk göwünlilik, myhmansöýerlik, hoşniýetli goňşuçylyk ýaly ajaýyp häsiýetleri siňdirilendir. Türkmenistanyň hormatly Prezidenti Arkadagly Gahryman Serdarymyzyň dost-doganlyk gatnaşyklaryny ösdürmek baradaky parasatly sözlerini şu ýerde mysal getirmegi makul bildik: “Bu gün Türkmenistanyň dünýä döwletleriniň we halklarynyň arasynda dost-doganlygy pugtalandyrmak, halkara gatnaşyklarda ynanyşmak medeniýetini ösdürmek babatda alyp barýan umumy adamzat ähmiýetli tagallalaryna ýokary baha berilýär” (Serdar Berdimuhamedow. Magtymguly – dünýäniň akyldary. – Aşgabat: TDNG, 2024. 58 s.).
